Ethiopia — July 2026

2.4K

‹‹ዑራኤል የተባለ መላእክ ሊረዳኝ መጣ›› (ዕዝ.ሱቱ ፪፥፩)

በነገደ መላእክት ከተሾሙት ሰባቱ ሊቃነ መላእክት አንዱ ቅዱስ ዑራኤል የቅዳሴ ቤቱ የሚከበርበትና ለነቢዩ ዕዝራ ሱቱኤል የዕውቀትን ጽዋ ያጠጣበት ዕለት ሐምሌ ፳፪ በቤተ ክርስቲያናችን በድምቀት ይከበራል፡፡ በመከራ ጊዜ ረዳት የሆነው የመላእክት አለቃ ቅዱስ ዑራኤል በዘመናት ለነገሡ የሀገራችን ነገሥታት ያደረገውም ውለታ እጅግ ብዙ ነው፡፡ ዳግማዊ ቆስጠንጢኖስ የተባለ ንዋየ ማርያም በነገሠበት ዘመነ መንግሥት ቅዱስ ዑራኤል በጸሎቱ በመራዳትና እስከ ግዛቱ ፍጻሜ ባለመለየት ሀገሩን እንዲመራ አድርጓል፡፡ ንጉሡም ሃይማኖቱ የቀና እና የአምላክን እናት እመቤታችን ቅድስት ድንግል ማርያምን የሚወድ ስለነበር ኢትዮጵያን በቀናች ሃይማኖት ሊመራት ችሏል፡፡ ይህም ንጉሥ አስቀድሞ በወንጌላዊው ሉቃስ እጅ የተሳሉትን የእመቤታችን ስዕሎች ከኢየሩሳሌም በማስመጣት አንዲቱን ስዕል ቅዱስ ዑራኤል በአምላካችን ደም በቀደሳት ጎጃም ውስጥ በምትገኘው ጀብላ ተብላ በምትጠራ ስፍራ አስቀምጦ ነበር፡፡ ሁለተኛውን ስዕል በደብረ ወርቅ ካስቀመጠ በኋላ ሦስተኛውን ደግሞ በሐይቅ ውስጥ አኑሯታል፡፡ ወንጌላዊው ዮሐንስ የሳለውን የቅዱስ ዑራኤልን ስዕል ግን በከተማው ውስጥ በወርቅ ግምጃ በተሠራ ድንኳን ውስጥ ከእርሱ ጋር አኑሮታል፡፡ የጌታችን መድኃኒታችን ኢየሱስ ክርስቶስ የቀይ ግምጃ ልብሱን ደግሞ ቅዱስ ዑራኤል በጌታችን ደም በቀደሳት በአምባሳል ሀገር በክብረ ነገሥት ደብር ውስጥ አስቀምጦታል፡፡ ደብሩም ከከበሩት አድባራት ሁሉ ይልቅ ክብሩ ከፍ ያለ ስለነበር ‹ደብረ ከርቤ› ተብሎ ተሰይሟል፡፡ ንጉሥ ዘርዐ ያዕቆብ ደግሞ በዘመነ መንግሥቱ በጌታችን ኢየሱስ ክርስቶስና ቅድስት ድንግል ማርያም ስም ከሠራቸው ቤተ ክርስቲያናት በተጨማሪ በቅዱስ ዑራኤል ስም ቤተ ክርስቲያን በደብረ ብርሃን በማሠራት የመልእኩ ስም እንዲጠራና ክብረ በዓላቶቹ እንዲከበሩ አድርጓል፡፡ ይህም ንጉሥ እስላሞች የከበረ ወርቆችን ለመውሰድ ፈልገው ሳይሳካላቸው ሲቀር የእስክንድርያውን ሊቀ ጳጳ አባ ሚካኤልን አስረው በግብጽ የሚገኙ አብያተ ቤተ ክርስቲያናትን በእሳት ባቃጠሏቸው ጊዜ ሰምቶ ወደ ግብጽ በመሄድ ተዋጋቸው፡፡ በእመቤታችን ድንግል ማርያም ረዳትነትና በቅዱስ ዑራኤልም አማላጅነት የእስላሞቹን ንጉሥ አሕመድን እንዲሁም የአዳልንና የጥልጣል ባላባት በድላይንንም ገደላቸው፡፡ አባ ሚካኤልን ደግሞ ከእስራቱ ፈትቶ ከጌታችን ኢየሱስ ክርስቶስ ጋር ወደ ኢትዮጵያ ይዞት መጥቷል፡፡ መስቀሉንም አባቱ ዳግማዊ ዳዊት ባሳነጸው ሕንጻ ውስጥ በድብረ ከርቤ እንዲቀመጥ አድርጓል፡፡ ንጉሥ ዘርዐ ያዕቆብ ንግሥት ዕሌኒ በእመቤታችን ስም ቤተ ክርስቲያናን እንድትሠራ ካደረገ እና ሥርዓተ ቅዳሴው ከተፈጸመ በኋላ ጌታችን ተገልጾላቸው በቀራንዮ በተሰቀለ ጊዜ ከጐኑ በፈሰሰው ደሙ ቅዱስ ዑራኤል ደብሯን ቀድሷታል፡፡ ከዚህም በመቀጠል ንጉሡ በደብረ ብሥራት ሁለት ቤተ ክርስቲያን ሠራ፡፡ እንዲሁም በቀኝዋ ሁለት ቤተ ክርስቲያናት በመሥራት አንደኛዋን ‹ሰይፍ አጥራ› ብሎ ሰይሟታል፡፡ የዚህም ምክንያት ሕንጻ ቤተ ክርስቲያኗ በተጀመረ ጊዜ ቅዱስ ዑራኤል ከእሳታውያን መላእክት እና ከእመቤታችን ጋር የእሳት ሰይፎችን ይዘው በክንፎቻቸው አጥረዋት ስለተመለከተ ነበር፡፡ ሁለተኛዋን ቤተ ክርስቲያን ደግሞ ‹እድ አጥራ› ብሎ ሰይሟታል፡፡ ንጉሡም ከዚህ በኋላ ሌሎች ቤተ ክርስቲያናትን ሠርቷል፡፡ የዚህም ንጉሥ ዘርዐ ያዕቆብ ልጅ እደ ማርያም በነገሠ ጊዜ በቅዱስ ዑራኤል ስም ቤተ ክርስቲያንን አሠርቷል፡፡ ለበዓሉ መታሰቢያም ይሆን ዘንድ ለደብሩ ዐርባ ዐራት ርስተ ጉልትን ሰጥቷል፡፡ የደብሯንም ስም ‹ምስዓለ ማርያም› ብሎ ሰይሟታል፡፡ ይህም ንጉሥ የአባቱን ፈለግ ተከትሎ ሌሎችን ቤተ ክርስቲያናትን ሠርቷል፡፡ ከንጉሥ ይኩኖ አምላክ ጀምሮ እስከ ንጉሥ ናዖድ ድረስ ያሉትን ዘጠኙ ቅዱሳን አባቶችና ነገሥታት የሥራቸውን ዜናና የቀናች ሃይማኖታቸውን ጽንዓት በድርሳነ ዑራኤል ተጽፏል፡፡ የክርስቲያን ወገኖች የሆንን በሙሉ የዚህን ተረዳኢ መልእክ ቅዱስ ዑራኤል በዓል ልንዘክር ይገባል፤ እርሱ እኛን በግልጥና በስውር ከሚመጣ ጠላት ከክፉ ነገር ሁሉ የሚጠብቀን ነውና፤ እንደ ጥላና እንደ በረሃ አበባ ከሚጠፉው ከዚህ ኃላፊው ዓለምና ከጽኑ ጠላት ያድነናል፡፡ አምላካችን የድንግል ማርያም ልጅ በአባቱ ምስጋና በሚመጣበት ጊዜ በቅዱስ ዑራኤል አማካኝነት ከዘለዓለማዊ ሞት ይታደገናል፡፡ ዓለማችን በኃጢአት ማዕበል ተውጣ እንዲህ በጭንቅና ጣር ላይ ባለችበት በዚህ ጊዜ በውስጧ የምንኖር ሰዎች ይህን መከራና ሥቃይ ተቋቁመን ለማለፍ የሚቻለን በቅዱሳን አማላጅነት ተራዳኢነት ነው፡፡ በሰላም ወጥቶ መግባት፣ ውሎ ማደር እንዲሁም መኖር ያቃተን እጅግ በርካታ ሰዎች ልንኖር እንችላለን፡፡ በዚህም ሳቢያ ተስፋ ቆርጠንና ከያዝነው እውነተኛ መንገድ ወጥተን ወደ ጨላማው ሕይወት እንዳንገባ ምርኩዝ ድጋፍ የሚሆነን የእነርሱ ጸሎት ነው፡፡ ምንም ቢሆን ከክፋት ለመራቅና በኃጢአት ከመውደቅም ሊጥለን የሚፈታተነን ጠላት መዋጋት ያስፈልጋል፡፡ መሣሪያችንም ጸሎት፣ ጾምና ስግደት በመሆኑ በእነዚህ ሁሉ ምግባራችንም የቅዱሳኑ አምላጅነት ስለሚያስፈልገን ተግተን እነርሱን ልንማጸናቸው ይገባል፡፡ የመላእክት አለቃ ቅዱስ ዑራኤል የጸሎቱና የረዳትነቱ ኃይል አይለየን፤ አሜን! ምንጭ፡- ድርሳነ ዑራኤል ዘሐምሌ

@Ethiopian_Orthodox @Ethiopian_Orthodox

Jul 29, 06:22 AMMore from @ethiopian_orthodox

1.5K

@Ethiopian_Orthodox @Ethiopian_Orthodox

Jul 29, 06:19 AMMore from @ethiopian_orthodox

1.4K

የዚህ ጽሁፍ አዘጋጅም በዚህ በጨረሻው ሀሳብ ይስማማል፡፡ ሰማያዊ ክብርን የሚያስገኝ አኩሪ ገድል በመፈጸም የቤተክርስቲያን ታላቅ አለኝታ አባትና መሪ የሆኑት የዘመናችንን ታላቅ ሰማዕት አቡነ ጴጥሮስን ትውልዱ የግድ ሊያስባቸውና ሊዘክራቸው ይገባል፡፡ የተባበሩት መንግሥታት ድርጅት (united nations) አቡነ ዼጥሮስን "የሺህ ዓመቱ ምርጥ ሰማዕት" ወይም በፈረንጅኛው አፍ (MARTYR OF THE MILLENIUM) በሚል መጠሪያ ሰይሟቸዋል፡፡ ላልተነገረላቸውና ላልተዘመረላቸው ለእኚህ ብርቅዬ የቤተ ክርስቲያናችን ድንቅ አባት ቅዱስ ሲኖዶስ በጥቅምት 12 ቀን 1998 ዓ.ም እኚህን ሰማዕት ‹‹አቡነ ጴጥሮስ ሰማዕተ ጽድቅ ዘኢትዮጵያ›› ተብለው እንዲጠሩ ወስኗል፡፡ በስማቸውም መቅደስ እንዲታነጽ ፈቅዶ በመጽሐፍ ቅዱስ ትእዛዝ መሠረት (ኢሳ 56፡4) ቅድስት ቤተ ክርስቲያናችን ጻድቁ በተወለዱበት ሥፍራ መታሰቢያ አቁማላቸዋለች፡፡ ግንቦት 1 ቀን 2001 ዓ.ም በስማቸው የተሰየመው ሕንጻ ቤተ ክርስቲያንና መታሰቢያ ሐውልታቸው ሲሠራ የፍቼ ከተማ ነዋሪዎች የሆኑ የእስልምና እምነት ተከታዮችም ጭምር ለግንባታ የሚሆን አሸዋ ከመርዳት አንስቶ በምረቃው ሥነ ሥርዓት ላይ ድንኳን እስከመትከል ተሳትፈዋል፡፡ በገንዘብም በጉልበትም ተባብረዋል፡፡ ጠላት ድል ተደርጎ ሀገራችን ነፃነቷን ከተቀዳጀች በኋላ የአባታችንን እጅግ አኩሪ ታሪክ ሲያዘክራቸው እንዲኖር መታሰቢያ ይሆናቸው ዘንድ በግርማዊ ቀዳማዊ ንጉሠ ነገሥት አሳሳቢነት ሐምሌ 16 ቀን 1938 ዓ.ም በአ.አ መሐል ከተማ ላይ ሐውልት ቆሞላቸዋል፡፡ የሰማዕት አባታችን በረከታቸው ትደርብን!

@Ethiopian_Orthodox

ብፁዕ አቡነ ጎርጎርዮስ ካልዕ ሊቀጳጳስ /1932 - 1982 ዓ.ም/

ብፁዕ አቡነ ጎርጎርዮስ በ1933 ዓ.ም በያኔው የወሎ ጠቅላይ ግዛት ደሴ ከተማ ከአባታቸው አቶ ገበየሁ እና ከእናታቸው ወ/ሮ አሰለፈች ተወለዱ። ብፁዕነታቸው መዓርገ ጵጵስናን ከመቀበላቸው በፊት አባ መዝገበሥላሴ ይባሉ ነበር።

ዕድሜያቸው ለትምህርት እንደደረሰም በደሴ መድኃኔአለም ቤተክርስቲያን የመጀመሪያ እና ሁለተኛ ደረጃ መንፈሳዊ ትምህርታቸውን አጠናቀቁ። ከዚያም ትምህርታቸውን ለማስፋፋት ወደ ወሎ ላስታ ነአኩቶለአብ በመሔድ ከአባ ክፍሌ ዘንድ የውዳሴ ማርያም እና ቅዳሴ ማርያም ትርጓሜ አዕማደ ምሥጢርና ባሕረ ሐሳብ ተማሩ።

ብፁዕ አቡነ ጎርጎርዮስ በወቅቱ የወሎ ሀገረስብከት ሊቀጳጳስ ከነበሩት ብፁዕ አቡነ ይስሐቅ መዓርገ ዲቁናን ተቀበሉ። ከዚያም ወደ አዲስ አበባ መጥተው በመታሰቢያ ቤት ታዕካ ነገስት በኣታ ለማርያም ገዳም ገብተው ሐዲሳትን ተማሩ። ከዚያም ወደ ደብረሊባኖስ በመውረድ ምንኩስናን ተቀበሉ። በመቀጠል ወደአዲስዓለም በመሔድ አፈወርቅ መንገሻ ከተባሉ ሊቅ ቅኔን ከነአገባቡ ተማሩ።እንደገና ወደ ደብረሊባኖስ ተመልሰው መምህር ፍሥሐ ከተባሉ ሊቅ የሐዲሳት ትርጓሜ እና ትምህርተ ሃይማኖትን፣ መምህር ቢረሳው ከተባሉ ሊቅ ደግሞ መጽሐፈ ሊቃውንትን እንዲሁም ከመምህር ገብረ ሕይወት የሐዲሳት ትርጓሜን አደላድለው ተመረቁ።በዚሁ ደብርም ቅዳሴን ከነሥርዓቱ አጠናቀው ተመርቀዋል። ከብፁዕ ወቅዱስ አቡነ ባስልዮስ መዓርገ ቅስናን ተቀበሉ።

ከዚህ በኋላ ብፁዕነታቸው የቁልቢ ቅዱስ ገብርኤል ገዳምን ለሁለት ዓመታት ካስተዳደሩ በኋላ በ1963ዓ.ም ወደ ግሪክ ተላኩ።በዚያም ፍጥሞ በተባለችው ደሴት ከሚገኘው ነገረሃይማኖት ትምህርት ቤት ተምረው በዲፕሎማ ተመረቁ ትምህርቱን በመቀጠልም ወደ አቴና ዩኒቨርሲቲ በማቅናት ለአራት ዓመታት የነገረ መለኮት ትምህርታቸውን በመከታተል በማስተርስ ተመርቀዋል። ወደ ስዊዘርላንድ በማቅናትም የፈረንሰኛ ቋንቋ አጥንተዋል።

ብፁዕነታቸው ወደኢትዮጵያ ከተመለሱ በኋላ ጥር ወር 1971 ዓ.ም በብፁዕ አቡነ ተክለሃይማኖት አንብሮተ ዕድ ከተሾሙት አባቶች አንዱ በመሆን መዓርገ ጵጵስና ተቀበሉ። የቅዱስ ፓትርያሪኩና የቅዱስ ሲኖዶስ ጸሐፊ ሆነው አገልግለዋል።በነበራቸው ኃላፊነትም ምቅዋመ ሕግ/ሕገ ቤተክርስቲያን/ አርቅቀዋል። ዘመን የማይሽራቸው "የቤተ ክርስቲያን ታሪክ በዓለም መድረክና የቤተ ክርስቲያን ታሪክ በኢትዮጵያ" የሚሉት መጻሕፍቶቻቸው ግሩም ሥራዎቻቸው ናቸው።

ከዚያም ሙሉ ትኩረታቸውን ብዙ ሥራ ወደሠሩበት የዝዋይ ገዳም አድርገዋል። ብፁዕነታቸው በዚያም ገዳሙንና መንፈሳዊ ትምህርት ቤቱን በማስፋፋት ታላቅ ሥራ ሰርተዋል። በነበራቸው ወጣቱን ትውልድ የመያዝ ፍላጎትና ችሎታ በወቅቱ በከፍተኛ የትምህርት ተቋማት ይማሩ የነበሩ ተማሪዎችን በክረምት ወደ ገዳሙ እንዲገቡ በማድረግ የቅድስት ቤተ ክርስቲያን ትምህርት በመማር ዘመኑን እንዲዋጁ አድርገዋል ። እርሳቸው ለሁለት ለሦስት ክረምቶች ሰብስበው ያስተማሯቸውና የመከሯቸው ተማሪዎች ዛሬ ቊጥራቸውን አበራክተው በማኅበረ ቅዱሳን ደረጃ በመሰባሰብ በዕውቀታቸውና በገንዘባቸው ቤተ ክርስቲያንን እና አባቶችን እያገለገሉ ይገኛሉ።

ብፁዕ አቡነ ጎርጎርዮስ ለዐሥራ አንድ ዓመታት በዚህ ዓይነት ከፍተኛ እና አርአያነት ያለው አገልግሎት ካበረከቱ በኋላ ሐምሌ 22 ቀን 1982 ዓ.ም በመቂ ቅዱስ ሚካኤል ለሚገኙ ምእመናን አባታዊ ትምህርታቸውን ለመሠጠት ሲገሰግሱ በድንገት በደረሰባቸው የመኪና አደጋ በተወለዱ በኀምሳ ዓመታቸው ዐርፈዋል። የብፁዕነታቸው በረከት አይለየን።

@Ethiopian_Orthodox @Ethiopian_Orthodox

Jul 29, 06:19 AMMore from @ethiopian_orthodox

1.6K

@Ethiopian_Orthodox @Ethiopian_Orthodox

Jul 29, 06:19 AMMore from @ethiopian_orthodox